हङकङ समाचार तथा विविध जानकारी

हङकङका कवि र कविताहरु भव्यताका साथ सम्पन्न (+Photo)

August 17th, 2008

एचकेनेपाल डट कम, अगष्ट १७ -
हङकङमा अक्सर आसन र भाषणबाट सञ्चालन हुने गरेका कार्यक्रमहरुको परम्परालाई तोड्दै आसन र भाषणबिना नितान्त साहित्यिक माहौलमा “हङकङका कवि र कविताहरु” कार्यक्रम जोर्डनस्थित कङगन रेष्टुरेण्टमा आज अगष्ट १७ तारिख आइतबारका दिन सम्पन्न भयो।

अधिकांश साहित्य अनुरागीहरुको जमघट भएको उक्त कार्यक्रमलाई साहित्यकार कमल पौडेलले आफ्नै रेष्टुरेण्टमा आयोजना गर्नुभएको थियो। पौडेल अन्तर्राष्ट्रिय साहित्य समाज हङकङ च्याप्टरका उपाध्यक्षसमेत हुनुहुन्छ। यसअघि उहाँले गत फेब्रुअरी १७ तारिख यस्तै साहित्यिक कार्यक्रम आयोजना गर्नुभएको थियो। यो सोही कार्यक्रमको निरन्तरता - दोश्रो श्रृंखला हो। अर्धवार्षिकी रुपमा सुरु गरिएको अर्को तेश्रो श्रृंखला फेब्रुअरीको मध्यतिर आयोजना गरिने कवि पौडेलले बताउनुभएको छ।

प्रायः पार्टी, भोज भतेरले खचाखच हुने रेष्टुरेण्ट आज साहित्यमय बनेको थियो। साहित्यिक कार्यक्रम - साहित्यिक संस्थाले मात्र आयोजना गरिनु पर्छ भन्ने मान्यता तोड्दै आयोजित कार्यक्रममा हङकङका नयाँ तथा पूराना कवि कवियत्रीहरुले आफ्ना रचनाहरु वाचन गरेका थिए। कविता वाचन कार्यक्रममा कमल पौडेल, प्रकाश केसी, राजाराम शाही, हेमकला राई, मोती चाम्लिङ, राजेन्द्र कुमार थापा, अनिता गुरुङ, केवल गंगा गुरुङ, दिनेश सुब्बा, सुशिलकुमार लम्साल, उत्तम न्यौपाने, आशा दाहाल, जयकुमार राई, भोगेन एक्ले, सुमलकुमार गुरुङ, डीबी. पालुङ्वा, केशवप्रसाद भट्टराई, चन्द्र मादेन, मिङ्मा मादेन, गणेश पराजुली, यशोदा पराजुली, नागेन्द्र श्रेष्ठ, सुरेन लिम्बू, प्रदिप कन्दङ्वा, आकाश राई, प्रकाश राई, टंक साम्बाहाम्फे र पशन तमूलगायतका कवि तथा कवियत्रीहरूले आफ्ना र अरु कविहरुका कविताहरु वाचन गरेर सुनाएका थिए।

करीव ४ घण्टा सञ्चालित “हङकङका कवि र कविताहरु” को तेश्रो संस्करण ६ महिनापछि फेब्रुअरी मध्यतिर सोही ठाउंमा आयोजना गरिने जानकारी आयोजक कमल पौडेलले दिनुभएको छ।

तस्विरः जगत अम्बु गुरुङ / एचकेनेपाल डट कम। थप तस्विरहरु हेर्न यहाँ क्लिक गर्नुहोस्।

Popularity: 6%

Entry Filed under: हङकङको समाचार