अनेसास हङकङ साहित्य विविध

परदेशीलाई देशको पत्र (कविता) - टोपबहादुर राई

November 8th, 2008

परदेशीलाई देशको पत्र …
- टोपबहादुर राई

सबै उस्तै छन्
जस्तो थियो हिजो
अनि
अस्ति
तिमीले गाउं छाड्नु अघि
चौतारीमा विच्छयाइएका बम,
विस्थापित शून्य गाउं,
कांडेतारले घेरिएका शहर
र
डुबान पीडित तराई
सबै उस्तै उस्तै छन्।

संविधान सभाका फुस्रा गफ
गाउंमा बाडिएका खोक्रा आश्वसन
श्रीपेचरहित राजा
र
अन्यौलबीच प्रजा
बांकी सबै उस्तै उस्तै छन्
जस्तो थियो हिजो
अनि
अस्ति
तिमीले देश छाड्नु अघि ।
फाट्दै गएको धार्मिक सहिष्णुता
विखण्डनका काला योजना
सत्ता लिप्साका नयां खेल
र
पुरानै कोट भिरेका नयांहरु,
बांकी सबै उस्तै उस्तै छन्
जस्तो थियो हिजो
अनि
अस्ति
तिमीले नेपाली होइन भन्नु अघि ।
च्याउ झै पलाएका सयौ आतंक विरुवाहरु
सडकमा जलेका टायरका मुस्लो
प्रतिशोधले दोबाटोमा तेर्साइएका गन्धे लासहरु
र
नंग्याइएकी नेपाल आमा म
बांकी सबै उस्तै उस्तै छन्
जस्तो थियो हिजो
अनि
अस्ति
तिमीले नेपाल चिन्दिन भन्नु अघि ।

हालः हङकङ

Recent Videos:

Popularity: 24%

Entry Filed under: कविता